佢同埋阿哥鴛鴦係9月20號晚開始同我地一齊生活, 我好開心呀. 雖然佢唔可以同阿B一齊玩, 但起埋都俾佢見到兩個細佬係個籠入面, 都叫做有個伴丫.

點知係10月頭, 朱古力就開始唔妥, 點解佢行路會跌下撞下咁奇怪既呢.. 於是3號晚帶佢去睇醫生, 醫生話佢有細菌係喉嚨位置, 感染成中耳炎, 影響佢既平衡力, 問我有無留意到佢個頭係側去右邊少少喎.............   佢地話對於天竺鼠黎講, 呢d細菌好厲害, 會引致命危架... 開左D抗生素, 仲要開D草粉餵佢食(因為佢瘦左), 要幫佢增肥喎.. 好在阿仔佢都仲好鍾意食野o者..

可惜, 佢愈來愈差, 由可以跌跌撞撞咁行變成企唔到起身, 想食野, 只可以靠對腳撐下撐下咁去揾野食, 不過佢間唔中都可撐到起身, 行兩步架, 而且仲肥左潻....

14號星期六帶佢返去覆診, 醫生話佢而家個肺有聲, 可能d菌落左個肺度引致肺炎. 由於用係天竺鼠既藥阿仔第一次都已經試過, 所以佢開左d俾貓狗既抗生素佢試, 但d份量就減到好少, 因為唔知點預俾佢....  我都知佢係差左既....

15號帶左佢去大圍睇另一個好出名既醫生, 佢話因為朱古力細隻聽唔出佢個肺係咪有雜聲, 但同佢做左d test, 覺得佢係個腦有事, 因為佢個頭唔係向一面側, 而係左右兩邊都有... 同埋佢對眼既瞳孔係放大既....... 對於天竺鼠來講, 佢地未見過呢d case, 如果我地要繼續診斷可以試下做幾樣野. 1> mri (磁力共振), 2> 照腦, 3> 抽腦部組織去化驗..... 同人一樣咁樣做喎, 下.. 唔係麻...

最後我地決定俾佢試約, 佢開藥既份量比較重, 朱古力食左兩, 三次之後, 已經全身無力, 連撐手撐腳既力都無.. 見到咁樣, 我地係18號個日朝早停左一次藥, 個晚俾返佢食第一個醫生開既藥佢食, 幾日之後佢d手手腳腳開始有返d力, 但係始終都唔可以再起返身行....

由佢睇第一次醫生開始, 每日既早晚我都要抱住佢用針筒餵佢食藥, 食草粉.. 佢好乖好乖, 亦令我愈來愈愛錫佢... 我好似照顧緊一個初生既bb, 同佢好close好親密, 有時佢食完野, 會俾佢繼續係我個身上面訓覺.. 唔知點解佢都好鍾意咁樣訓.....  可惜佢愈來愈無胃口, 重輕磅左潻.  25號晚係我最後一次餵佢食野, 個晚佢好乖, 竟然成樽草粉食晒, 我仲好開心咁以為佢好返d潻.... 點知

第二朝早, 當我沖好d草粉, 去佢個籠度打算抱佢出黎既時候, 見到佢係度好辛苦咁用個口吸氣.. 我即刻抱起佢, 但係佢個身已經軟晒, 仲有d凍........ 我抱住佢, 陪佢走埋最後一段路.....

朱古力真係乖仔, 佢咁辛苦都仲要等埋阿爸阿媽起身先走................. 我好唔捨得放低佢, 真係好唔捨得....................   朱古力真係好得意, 好可愛架 .................

後記: 原本應該要係28號帶佢去覆診, 可惜佢都係等唔到.......  

雖然我真係好唔捨得朱古力, 不過見佢咁辛苦, 佢既離開係一件好事. 而且對於我地兩個來講都係一種解脫. 但我好懷念抱住佢個種親密感覺, 真係好掛住我既乖仔..............