第一次見到佢係竉物店,當時佢同另一隻白色長毛兔係一個籠入面,但當我地行埋去時,就得佢識企係身,好似好想跟我地返屋企咁. 結果,當然都係跟了我地返屋企了.

亞寶佢好活潑,初初返到屋企,佢已經唔怕醜,係間屋周圍走.但可能因為我懶,無勤力清潔佢個籠,搞到佢其中一隻後腳潰爛,我地要成日捉住佢幫佢敷藥,可能咁搞到佢後來以為我地抱起佢都無好野,所以唔鍾意俾人抱. 我只係係竉物店同初初返到屋企抱過佢咋!

不過咁又唔代表亞寶唔鍾意我地, 佢好鍾意我地搔佢腮,佢會咪埋眼,好享受咁.如果停手,佢就會不停舐我地隻手,個頭重會側埋,表示你要繼續幫佢搔.

佢又好鍾意跟我地出去"lift"口,我地會出去掉垃圾,夜晚會無乜人,所以我地會叫埋寶寶出去.只要我地話"寶寶,出街街啦!" 佢就會第一時間走去門口,等我地開門. 但如果我或者我女朋友重係間屋度,佢就會企係門口,唔肯走開,一定要我地兩個人一齊都出咗去,佢先會好開心咁跟住我地走.其實佢只係要走下一兩個圏,就會乖乖自己走返屋企門口.

但自從上個月底開始,寶寶胃口大減,但每當我地食麥當勞,或食出前一丁,佢都表現得好興奮,企晒起身,所以我地重以為佢唔食自己糧,要食人的食物.沒有帶她看醫生,想不到鑄成大錯.

其實原本上星期一我同我女朋友都好開心,因為第二日我地就飛去日本,四日三夜,第一次自己去,心情好興奮.我地都叫左個信得過的朋友來照顧寶寶.我重記得回來當晚(上星期五,10月15日),夜晚九點幾回到家,已見寶寶在門口等我地回來,當時佢重係屋度周圍走,毫無異樣.雖然朋友話佢係我地去咗日本呢段期間都無食野,但我地都以為佢只係掛住我地,因為我地餵佢食野,佢都有食. 但始終都係唔放心,我決定星期二帶佢去睇醫生.(因為星期二才有時間)

點知星期一(10月17日)一早,見到亞寶個樣好唔妥,開左個籠度門,亞寶跳出來,但連企都企唔到,成身軟晒,我女朋友見到,都即刻請假帶佢去睇醫生.但可能已經太遲,亞寶睇完醫生返到屋企,兩個鍾唔夠,連第一次藥都未食,就已永遠離開我們了......

當晚我同我女朋友都哭得好厲害,覺得好內疚,去了旅行,又不早點帶寶寶睇醫生,可能早點發現,結果會好唔同. 但現在一切都已成定局,我們只能永遠懷念寶寶.望著吉的籠子,好失落.

寶寶,真的很對不起!!