小灰就非常細膽,鐘意自己一個,但佢就鐘意人摸佢,佢比較獨立D,出黎玩都係一樣,有時望住佢,佢既眼神話比我知,佢係知道我鍚佢既,小灰初時都係跑跑,跳跳咁,小灰就冇咁百厭,但都好活潑,會走入櫃底,跳上梳化,跳上床,到左後來佢成日都係廁所度,一出黎就入左廁所直到夜晚都可以唔出黎,係到我訓覺先抱佢入去!我放左D食物同水比佢,佢要我成日陪住佢,佢亦知道係有人鍚佢,關心佢!果時我都未有數碼相機,呢D相都係借朋友部黎影既,相簿就有D再肥D,得意D既,不過就冇辦法比你地睇到喇!小灰陪左我差唔多兩年半,係呢段日子我亦都係好開心,見到佢肥嘟嘟咁豎起兩隻大耳朵望住我幾得意呀!

小灰從來都未病過,點知就係果年既冬天佢病左喇,佢好多日都唔食野,乜野都唔食,手腳跣下跣下咁,後來就帶佢去睇醫生啦,醫生話佢發燒,比左D葯啦,亦都叫我試下比D波羅汁比佢飲,睇下佢會唔會開胃D,過多幾日帶佢返黎覆診啦,我不斷咁摸住佢同佢傾計啦,到左第二朝,果日咁岩係星期日,我帶小灰去比醫生睇,醫生話佢已經退左燒喇,但就睇佢既氣色就唔係好好,就話我地醫貓狗就叻D,我而家即刻轉介你去大圍睇啦,不過佢地下午會休息,叫我地快D帶佢去睇,我當時立即坐車去睇啦,點知都未到站小灰就已經.........,我當時忍著D眼淚,但我都冇落車,一樣撘到去大圍一落左車我D眼淚就不斷咁湧出黎,我一路跑一路喊,都去比醫生睇下,睇下有冇得救,我淨係記得醫生同我講左一句說話就係Oh, too late,我喊得重大聲,係度喊左個幾鐘先走到,跟住我就同小灰講我一定會帶佢返屋企,唔會放低佢係度!一個禮拜之後就諗住買過一隻啦,點知呢隻重傷心,小灰既離開我亦都有自責過,如果我早D帶佢去睇醫生可能就冇事,如果個醫生早D介紹我去果邊亦都可能冇事!對唔住呀小灰!唉……!呢兩次既傷痛令我以後都唔想再養寵物喇!

小灰亦係在寵物店度相遇,雖然我地的緣份只得短短的兩年半,但就有如老朋友一樣有一份不可言喻的感情,我們的回憶永遠都會埋蔵在我心面!