在12月2日的一個晚上，我同我老公行經寵物店門口睇兔仔，摸下呢隻，摸下果隻，跟住行入店內，剛剛望到有一隻賓尼兔，我行近望住佢時，佢居然豎起兩隻大耳朵望住我，咁就吸引左我，我就叫店務員抱比我睇下啦，一抱上手果種特別既感覺係我以前重未有過，因為我唔係第一次養兔仔，我就知道我一定要帶佢返屋企！

初時我行近波仔度，佢就會走左去，摸下都唔多鐘意，想抱佢出黎玩佢重會胡我，但佢又唔鐘意自己一個喎，波仔就係好活潑又八卦，有次我同我老公係房度換床單，換完之後行出廳度唔見左波仔喎，原來跳入飯煲裡面玩，有試過跳入垃圾桶，好彩只係紙屑黎，最厲害果次就係跳左入馬桶重係我老公用緊，我老公用緊時波仔已經係旁邊企起身望下望下咁，之後就跳左入去啦！後來漸漸亦冇再胡我啦！呢次已經係一年幾之後啦，直到有次波仔食完野跳左出黎貼係我大腿旁邊
自呢一次之後我同波仔就形影不離，我去邊波仔都會跟住我，要我同佢玩、陪佢，佢會係咁跟住我隻腳，我行快D，佢又行快D，我跑佢又跟住跑，好得意，佢亦淨係同我玩，嗲我，比我摸，我老公同我媽咪同佢玩，波仔都唔採佢地，但係咁樣，如果我有乜事，波仔就會好可憐！

到舊年我真係有事入左醫院兩個禮拜，呢兩個禮拜簡直生不如死，自從買左波仔返黎之後都未試過有一日離開過佢，連訓教都會搬埋個籠入房既，到左第9日我先可以落床，我老公知道左就即刻帶仔到醫院附近公園比我睇，我見到波仔瘦晒，真係心痛死呀，之前肥到見唔到D骨，而家D骨就突晒出黎，幾可憐呀，好彩過多幾日就出院啦，返到屋企波仔比以前更加嗲，更加黐我，可能佢驚我又會走左去啦！有波仔既日子每日都係咁開心，波仔好有性，好多野都知，我叫佢黎佢就會跑黎我度，真係好開心，波仔係我生命裡面係最重要既，比任何野都重要，如果當時唔係有波仔，我就冇咁生命意志，我好多謝波仔帶比我呢幾年開心歲月!

波仔以前試過中耳炎，又試過肚痾，好彩都冇事，直到今個月中波仔突然唔肯食糧，但就肯食草同飲水，唔知係咪冇食糧既關係，令到佢手軟腳軟咁，行步路都冇力跣下跣下咁，我抱佢上床睇下係咪D手腳有事，又冇事喎，佢都可以洗面，洗耳仔都係咁，咁我係17號星期六果朝咪打電話去BOOK醫生睇下，我想BOOK果個醫生要到星期二先有得睇，佢又問我隻兔仔有乜唔舒服，佢一聽到我話佢手軟腳軟話我重要等多幾日咩？我地有其他醫生都識睇兔仔架，咁我諗諗下都好啦，就今晚去睇啦！咁岩果日又打風，又落大雨，咁我就用左另一個寵物袋帶佢去睇醫生啦，去到醫生就話睇佢D牙就冇事,但D手腳呢就唔可以比佢再咁跣落去啦，咁睇完醫生我地飯都未食就快D去搵D唔跣又唔會比佢咬既又洗得既又踩得舒服既野啦，因為我之前有地墊既，波仔就咬到爛晒，所以就係咁搵，係咁搵，差唔多一個鐘，但都買唔到，咁之後我地就諗住快D食完碗麵返屋企先啦，食麵果時我用濕毛巾幫波仔抹身，比水佢飲，但佢就冇飲，原來波仔已經中暑喇,返到屋企打開個袋，然後即刻開冷氣開風扇，用針筒D水佢飲，佢好冇力咁飲左，但已經太遲啦，之後波仔呻吟左幾聲之後就離開左我，我抱住佢係咁喊，我好嬲我自己，係天意定還是....？我就算講一千句一萬句對唔住波仔都唔會返黎，我太錫佢變成害左佢，個心就係好緊張想快D買到野比波仔，等佢可以舒服D，點知....！其間我都有睇過波仔，但都冇乜事,唉,一 諗起果日令波仔咁痛苦就好憎自己，如果唔係話唔定到今日波仔重係我身邊跑跑跳跳！

我自己本身就信佛既，我係佛堂度幫波仔上左個位，等佢可以聽經，而我每日亦有念經迴向比佢，希望波仔係另一個世界可以活得開心，都唔知重可以為波仔做D乜野啦，希望有一日可以再同波仔再續未了緣！永遠都祝福你，波仔！